Eptu pawl MP ten SIR duh lohna lantirin kawng zawh

Eptu party intelkhawm, INDIA bloc MP-te chuan nimin khan Bihar-a electoral ennawnna, Special Intensive Revision (SIR) kalpui duh lohna lantirin Parliament-a Makar Dwar aṭangin Nirvachan Sadan, Election Commission of India office thleng kawng an zawh. Kawngzawh hi Delhi police-te'n lo dangin kawng zawhnaa tel MP 250 chu manin parliament street police station-ah hren zui an ni.

Kawng zawh hi Lok Sabha-a Leader of Opposition Rahul Gandhi kaihhruaia neih niin, MP eng emaw zat an tel. ECI chuan an headquarters-ah SIR chungchang sawi tur hian MP 30 chauh kal an remtih thu sawiin, an phal chin zat aia tam an pungkhawm tih an tarlang bawk. MP hren tawk zingah hian Priyanka Gandhi Vadra, Shiv Sena (UBT) leader Sanjay Raunt leh Sagarika Ghose-te pawh an tel.

Kawngzawhnaah hian thuziak leh poster hrang hrang ken a ni a, SIR kalpui chu vote rukna mai a nih thu leh kalpui chhunzawm loh an duh thutein an aurual bawk. Police hian kawngzawhte danna atan daidanna barricade siamin an lo dang a ni.

SIR chungchanga thil fel lo awm nia hriat a nih vanga kawngzawh huaihawta MP tel eng emaw zat hren an nih vangin Telangana chief minister A. Raventh Reddy chuan rorel lai sorkar chu sawiselin, inthlanna dik lo taka kalpui chu ṭha a tih loh thu a sawi. Hetih laiin LoP Rahul Gandhi pawhin an thiltih chu politics hmanga in beihna ni loin ram danpui humhimna zawk a nih thu a sawi lang. Man ve loh MP te chu dan an nihna hmunah lungawi lohna an lantir chhunzawm a ni.

Nimin tlai khan Congress party leader Mallikarjun Kharge chuan MP-te tan chawhlui buatsaihin inthlanna kaihhnawih thil dik tawk lo hmachhawn dan tur an rel.

INDIA bloc chuan parliament-a house pahnihah SIR kalpui a nih chungchang duh lohna hi July 21-a session ṭan ni aṭangin lantirin an aubuai a, rorel mumal thei loin session pawh vawi eng emaw zat tih tawp a ni tawh bawk.