National Metrology Conclave-ah PM-in thu sawi

Prime minister Naredra Modi chuan video conferencing kaltlangin nimin khan National Metrology Conclave-ah thu a sawi a, India chu khawvela vaccination programme lian ber kalpui turin a inbuatsaih mek a ni, a ti. 

National Metrology Conclave 2020 hi Council of Scientific and Industrial Research-National Physical Laboratory (CSIR-NPL), New Delhi buatsaih a ni a, PM bakah  Union Minister for Science and Technology, Earth Sciences, Dr Harsh Vardhan pawhin a hmanpui a ni. 

Modi chuan Pathiannia India rama hman tura Covid-19 vaccine pahnih, Covishield leh Covaxin pawm a nih tak chungchang pawh sawichhuakin, hripui leng mek dona kawnga scientist-te hnathawh leh hlawhtlinna chu fakin, India chuan a chhuang tak zet tih a sawi. 

Prime Minister chuan 'Make in India' hmalakna pawh sawiin, "India thil siama khawvel tihkhat chu kan duh ber a ni lo a, mahse khawvel  hmun hrang hranga India thil siam leitute rilru hneh chu kan duh a ni. Demand ringawt ni lo, Make in India product leitute an pawm thlap theih chu kan tum ber a ni. Quality leh a rintlakna lamah India brand-te kan thuam ṭhat zel a ngai a ni," a ti.