R-Day parade-ah hun hmang rei dawn lo

Hripui leng avangin January 26-a Republic Day lawmna chu kum dang angin buatsaih theih a ni dawn lo. A lawmna puala parade neih turah pawh marching contingent an tel tam dawn lo a, hun pawh an hmang rei dawn lo. 

Rajpath-a R-Day lawmnaa tel thei zat pawh nasa taka tihtlem a ni dawn a, social distancing dan khauh taka kenkawh a ni ang. Marching contingent bakah cultural performance neih ṭhin pawh kuminah chuan tihtlem vek a ni dawn. Parade hi kum dang ang bawkin Vijay Chowk aṭangin neih ṭan a ni ang a, mahse Red Fort thleng kal loin National Stadium bulah an tawp thung ang. Kum danga km 8.2-a thuia parade  neih ṭhin chu kuminah chuan km 3.3 chinah chauh neih a ni dawn a ni. A lawmna kal zat, kum danga mi nuai 1.3 vel tel ṭhin pawh kuminah chuan mi 25,000 chinah tihtlem a ni dawn a, naupang kum 15 hnuai lam leh kum upa zawk, natna benvawn neite chu an tel phal a ni dawn lo tih official chuan a tarlang. 

Kumin Republic Day lawmnaah hian Britain prime minister Boris Johnson chu khuallian a ni ang. 1971 war of liberation champha vawi 50-na pualin Bangladesh armed forces contingent pawh parade-ah an tel dawn a ni.