Covidshield vaccine man tur puang

Drug Controller General of India (DCGI) in India rama emergency atan hman tura Covid-19 vaccine pahnih a pawm zinga pakhat, Covidshield vaccine man tur chu Pathianni khan Serum Institute of India (SII) CEO Adhar Poonawalla chuan a puang. 

Poonawalla chuan Covishield vaccine hi sorkarah chuan  Rs 250 in an pe dawn a, mahse private market-ah chuan dose khat Rs 1,000 a ni dawn tih a sawi. Pfizer/BioNTech vaccine aiin a tlawm zawk dawn hle tih sawiin,a thawn kualna pawh a awlsam zawk dawn a ni, a ti. 

SII CEO chuan kumin kum laihawl thlengin India sorkar chuan mi vaibelchhe 130 chuang hnenah vaccine hi pek hman a tum tih sawiin, "Hemi atan hian vaccine lo siam tur pawhin kan inpeih tawh a ni. Sorkar hnenah pawh rawtna kan thehlut tawh a, contract sign hun kan nghak mek. Contract kan ziah fel aṭanga ni 10 chhungin vaccine te hi sorkar hnenah hian kan pe nghal thei ang, "tiin a sawi. 

Ram pawn lama vaccine thawnchhuak turin sorkar laipui phalna an la nghak mek tih Poonawalla chuan a sawi bawk. Phalna hi an hmuh theih chuan ram 50 chuangah an thawn chhuak thei dawn tih a sawi a ni. 

Subject Expert Committee of Central Drugs Standard Control Organisation (CDSCO)-in emergency atana hman tura a rawt hnuah, DGCI chuan Pathianni khan Covishield leh Covaxin te chu a pawm a ni. DGCI-in a pawm tak avangin heng vaccine-te hi pekchhuah thuai an ni ang.