China Foreign Minister Wang Yi-a'n India tlawh

China foreign minister(FM) Wang Yi chuan nimin khan ni hnih chhung cham turin India a rawn tlawh a, nimin vek khan external affairs minister (EAM) S Jaishankar nen inbiakna an nei nghal. India leh China hian inrintawkna thar siam chungchang te, remna leh muanna daih rei zawk leh ramri buaina neih chungchangte an sawi dawn a ni.

Prime minister Narendra Modi chuan thla hmasa khan China a han tlawh tawh a, hemi ṭum pawh hian ram pahnih inkar buaina tihziaawmna tur leh thawh dunna tur chungchang an lo sawi dun tawh a ni. China FM hian India a rawn tlawh hi ram pahnihte hun rei tak chhung an buai tawhna siamṭhatna an tumna a nih rin a ni bawk.

Wang Yi hian a cham chhungin National Security Advisor Special Representative (SR) Ajit Doval nen ramri chungchangah inbiakna an nei dawn a, an pahnih hian ramri chungchanga rampahnih aiawh ve ve an ni bawk. Meeting neih turah hian ram pahnih inkara harsatna hrang hrang awmte bakah ramri buainate, sumdawnna leh thlawhtheihna service tir leh chungchangte sawi tum a ni.

PM Modi-a'n Shanghai Cooperation Oraganisation (SCO) summit, China-ah kal dawn a, a kal hmain ram pahnih aiawhte hi an inbia ang. Modi hian India leh China inkar buaina 2020-a Line of Actual Control (LAC) huam chhunga buaina chhuah hnua China a tlawh lehna hmasa ber tur a ni bawk. SCO summit neih karlakah hian China president Xi Jinping nen inbiakna an neih beisei a ni bawk.