President-in National Sports Governance Bill pawm

President Droupadi Murmu chuan bill ngaihven hlawh, The National Sports Governance Bill, 2025 chu Thawhṭanni, August 18 khan a pawm. Bill pawm a nih thu hi sorkar laipui chuan Gazette notification a tichhuak tawh a ni. He bill, India ram sports hmelhmang tidanglam tur hi President hian hming a ziah hnan hnuah The National Sports Governance Act, 2025 a ni dawn ta a ni.

He dan thar atana hman tur bill hi August 11 khan Lok Sabha-ah pharh a ni a, eptu pawl lamin SIR chungchanga lungawi lohna an lantir chhunzawm reng karah sports minister Manuskh Mandviya chuan pharhin, rei lo te chhung sawi hona neih a nih hnuah pawm a ni. LS-a pawm tuk hian Rajya Sabha lamah darkar hnih chhung sawi hona neih a nih hnuin pawm a ni ve leh bawk.

National Sports Governance Act, 2025 hmang hian National Sports Board (NSB) din theih a ni dawn a, board kaltlang hian ram chhunga infiamna huang hrang hranga thuneihnate chu rorelna khat hnuaiah enkawl vek a ni dawn a ni. Sports body hausa ber, Board of Control for Cricket in India (BCCI) pawh board hnuaiah hian dah a ni tawh dawn bawk. Cricket board hian RTI dan hnuaia awm hi sorkar funding an nih loh vangin an duh lo a ni.

Infiamna pawl lian zawng zawng, state leh central sorkar aṭanga sum hmanga puihna dawng ṭhin chu Right to Information Act, 2005 hnuaiah public authority hnuaia awm tura tih a ni a, hengte hi puihna hrang hrang dawnte langtlang taka chhuizui theihna tur atana tih a ni. Sports act thar hnuaiah hian pawlah Executive Committee dinhmun chu term khat chauh chelh theih a ni tawh dawn a, hei hi thuneitu naupang zawk leh infiammi hruaitute tana hun ṭha siam theihna tura tih a ni.