INDIA bloc VP candidate atan B Sudershan Reddy ruat

Eptu pawl intel khawm INDIA bloc chuan vice president thlanna awm tur atana an candidate tur nimin khan an puang. Lungrual takin Supreme Court judge hlui B Sudershan Reddy chu vice president candidate atan an thlang. B Sudershan Reddy hi BJP kaihhruai NDA candidate Maharashtra, Governor CP Radhakrishnan nen an inkhing dawn a ni.

Congress party president Mallikarjun Kharge chuan," Vice president thlanna tur hi rilru sukthlek hmanga inbeihna tur a ni a, eptu pawl hrang hrangte chu hei vang hian B Sudershan Reddy-ah hian kan inlungrual a ni," a ti. Sawi zawmin INDIA bloc party-te chuan candidate inang neih chu an remti tih a sawi a,"Eptu pawl zawng zawng kan inlungrual thei chu ka lawm a, democracy hlawhtlinna tilang tu a ni" a ti bawk.

B Sudershan Reddy hi Supreme Court judge hna thawk ṭhin niin, he hna a chelh hma hian Gauhati High Court-ah Chief Justice a nih bakah Andra Pradesh High Court-ah judge hna hi a lo chelh tawh bawk. Kum 2011 khan Supreme Court judge aṭangin a chawl. Judge hna a thawh lai hian mipui zalenna ngai pawimawhtu, a rorelna reng renga mi rethei leh hnuaihnung zawkte ngaipawimawh ṭhin mi a ni.

Vice president candidate puannaah hian Kharge bakah INDIA bloc-a party hrang hrang hruaitu an tel a, an zingah hian DMK Kanimozhi, TMC Dtrek Obrien leh NCP Sharad Pawar te an tel bawk. Hetih laiin AAP aiawh hruaitu an tel lo thung. Eptu pawl hian candidate atana politics-a inhnamhnawih lo ruat chu an duh tlang niin an tarlang.