Bihar-a voter 80,000 address lem leh dik loah dah an ni

International journalist group. 'The Reporters Collective' in Bihar-a special intensive revision (SIR) kalpui dan an zirchiannaah, voter 80,000 chuang chu an chenna hmuna tarlan chu a lem leh dik lo an ni tih a sawi. Heng voter-te hi Bihar-a assembly constituency pathum huam chhunga mi an ni tih an tarlang bawk.

The Reporters Collective zirchianna, Pathiannia tihchhuahah hian Pipra, Bagaha, leh Motihari assembly constituency huam chhungah, chenna hmun chhinchhiah dan dik lo 3,590 a awm tih an tarlang. Heng chhinchhiah dan dik loah hian mipui hlawm lian tham tak chu hmun khata cheng ang veka dah an ni a, ṭhenkhat chu house number an dahsakte chu in awm lo te an ni bawk. Chenna dik loa dahte hi kum 2003 roll-a an chenna dik aṭanga paih an ni tih an hmu chhuak bawk.

Report tihchhuah aṭanga a landanin thil dik lo awmte hi Booth Level Officer (BLO) kut aṭanga thleng a ni a, zawh fel hun tur hun bituk rei lo lutuk vanga felfai lo niin a tarlang. Hei bakah BLO-te hi harsatna awmte sutkian leh dawnsawn dan hriattir an ni lo tih report hian a tarlang. Zirchianna kalpuitu chuan finfiahna nei tura inah te a kal chilh chu a ṭul tih an tarlang.

Zirchianna report-te hi eptu pawl hrang hrang aṭanga duh lohna lantir a nih hnuah leh parliament-a debate neihte rawt a nih hnuah tihchhuah a ni. Bihar-a SIR kalpui danah hian Lok Sabha Leader of Opposition Rahul Gandhi bakah INDIA bloc member hrang hrang chuan ECI hmalak dante duh lohna lantirin, ni 16 chhung awh tur "Vote Adhikar Yatra" chu Bihar-ah an huaihawt mek bawk.