MP cabinet-in chawlh lak dan thar pawm

Madhya Pradesh-a chief minister Dr Mohan Yadav hoa cabinet ṭhukhawm chuan Thawhlehni khan Madhya Pradesh Civil Services (Leave) Rules 2025 a pawm. Chawlh dan thar pawm hi 1977 leave rules thlakna tur leh sorkar laipui kaihhruaina siam zulzuia duan a ni. Hei bakah hian state hmasawnna hna thawhna tur hrang hrang an pawm tel bawk.

Dan thar hman tur hi tunlai mila duan niin hmeichhe tana maternity leave leh zirna huanga thawk tan chawlh lak theih hi kum khatah ni 10 tih belh a ni a, paternity leave chu a chhan a azirin ni 15 neih belh theih tur a ni dawn bawk. Mipa, mahnia fa enkawl tan chawlh theih chhung tih belh niin, half-pay leave pawh ni 10 chhung atana pek lawk tur a ni. Earned leave lak theih zat, ni 120 aṭangin 180-ah tih san a ni bawk ang.

Cabinet ṭhukhawm chuan EMC 2.0 project hnuaiah Bandikhedi khuaa Electronic Manufacturing Cluster siamna tur an pawm bawk. Cluster hian Electronics System Design and Manufacturing (ESDM) sector a ti hmasawn thei dawn a hemi atan hian ram acres 210.21 a zau an ruahman a, project thawhna tur hian a thuphungin Rs vbc 371.95 pawm a ni a, hei hi central tum tur Rs vbc 146.63 leh state tum tur Rs vbc 225. 32 belhkhawm a ni.

Ayurvedic Medical Colleges and Wellness Centres panga siamna chu pawm bawkin Reading, Cultural leh literary activities tihhmasawnna turin thingtlang khaw tina hman tur 'Geeta Bhavan Scheme' pawm a ni bawk. Cabinet hian zirlai tan thla 12 chhung scholarship pekna tur chu an hman lai, thla 10 chhunga pek ṭhin thlakna turin an pawm a, hei hi Tribal Welfare Department pek tur a ni. Bhopal-a Gandhi Medical College (GMC)-ah 'Department of Endocrinology' hawn tharna tur leh post thar 20 tihbelhna tur an pawm bawk.