Amit Shah bill put luh pathum JCP hnenah hlan

Union home minister Amit Shah chuan nimin khan Parliament monsoon session neih mekah bill pathum a pu lut a, heng bill-te hi Joint Committee of Parliament (JCP) ngaihtuah turin dah a ni. Shah bill put luhah hian Prime Minister, Union Minister, Chief Minister, states leh union territory-a minister, dan phal loh tia mante ban theihna tur bill a tel a ni.

HM Shah bill put luh pathumte hi The Constitution (130th Amendment) Bill, 2025, The Jammu and Kashmir Reorganisation (Amendment) Bill, 2025 leh The Government of Union Territories (Amendment) Bill, 2025-te niin, hengte hi ram hmelhmang hrang hrang ti danglam thei tura ngaih a ni. Pharh a nih hnu hian eptu lam aṭang pawhin sawisel leh aubuaina a chhuak zui nasa hle.

The Constitution (130th Amendment) Bill, 2025 hmang hian ram chhunga hruaitu hrang hrang Prime Minister, Union Minister, Chief Minister leh state/UT Minister te chu dan phal loh thil a tih vanga ni 30 chhung man/hren an nih chuan an hna chelh aṭanga ban theih an ni dawn a ni. Mahse, heng man an nihna aṭanga an zalen hnu hian an nihnate an chelh leh thei dawn thung.

Bill pathumte ngaihtuah tura tih, JCP-ah hian member 31 awmin Rajya Sabha aṭangin 21 leh Lok sabha aṭangin mi 10 an awm dawn a ni. Member-te hi chairman-in a ruat dawn a, committee-in bill chungchang a zirchiannate chu session neih leh hmasa bera a kar hmasa ber ni hnuhnung berah theh lut tura tih a ni.