Kum thar niah India-ah nau piang tam ber

United Nations children agency, UNICEF in a tarlan danin January 1 khan khawvel pumah nau piang 3,71,504 an awm a, India ram bikah nau piang hi tam berin hemi ni hian nau piang  59,995 an awm a ni. 

Kum thar nia nau piang zinga a zahve chuang hi ram 10-a piang an ni a; India-ah 59,995 awmin, China (35,615), Nigeria (21,439), Pakistan (14,161), Indonesia (12,336), Ethiopia (12,006), United States (10,312), Egypt (9,455), Bangladesh (9,236) leh Democratic Republic of Congo-ah nau piang 8,640 an awm bawk. 

Kum 2021-a nau piang hmasa ber hi Fiji rama piang a ni a, hemi ni veka nau piang hnuhnung ber chu US-a piang a ni thung. UN agency-in a chhut danin kumin chhung hian nau piang thar maktaduai 140 vel an awm dawn a, chawhruala mihring dam rei chin chu kum 84 in a chhut bawk a ni.