SC-in Central Vista Project thawh phalsak

Supreme Court chuan Parliament building thar sakna tur telna, Central Vista Project siam chung­changa petiton lut hrang hrangte a ngaih­tuah hnuin, nimin khan he project thawh hi a phalsak. 

Cheng vaibelchhe 20,000 hu Central Vista project-ah hian Rs vbc 971 senga Parliament building thar sakna tur hi a tel a ni. He project hmang hian Delhi-a Rashtrapati Bhavan leh India Gate inkar, km 4-a thuia sorkar building thar sak leh building awmsa ṭhenkhatte thuam ṭhat tum a ni. 

Nikum December 7 khan Supreme Court chuan project lungphum phum hi a phalsak a, hemi rual hian hna thawh ṭan emaw, building ṭhiah hna emaw thawh erawh a la phalsak tel lo a ni. December 10 khan prime minister Narendra Modi chuan Parliament building thar sakna tur lungphum hi a phum ta a ni. 

Parliament building thar hi cheng vaibelchhe 971 senga sak tuma ni a, kum 2022-ah zawhfel hman tum a nih thu Lok Sabha speaker Om Birla chuan a lo sawi tawh bawk. Sorkar laipui chuan tuna Parliament building hman mek, British awpna hnuaia awm laia sak, kum 1927-a hawn hi a hmun a chep tawhin, kangmei leh lirnghing laka him tura duan a ni lo tih an sawi. Hei bakah hian sorkar tan pawh chak zawka hna thawh a nih theihna turin central ministry zawng zawng chu hmun khata dahkhawm a ṭul tih a sawi a ni. 

Central Vista Project hnuaia Parliament building thar sak tur hi chhawng lia sang tur niin, ram square metre 64,500-a zauah sak a ni dawn a, MP 1,224 ṭhut theihna tur siam a ni ang. Constitution Hall lian tak siam tel a ni dawn a, MP-te chawlh hahdamna tur lounge pawh siam telin, library, committee room eng emaw zat, dining area leh parking space-te siam tel a ni bawk ang.