Thla ruk chhunga hri kai tlem ber ni thleng
India ram pumah Thawhṭanni khan hri kai hmuh chhuah thar mi 16.375 an awm a, thla ruk chhunga ni khata hri kai thar an tlem ber ni a ni.
Hri kai thar zingah hian UK-a hmuhchhuah, Covid-19 hri chi dang kai paruk an tel a, anni nen hian hri chi dang kai hmuh chhuah hi India-ah mi 58 an awm tawh. Thawhṭanni vek khan Covid-19 hri vangin mi 201 an thih belh leh a, ram chhungah he hripui thihpui hi mi 1,49,850 an awm tawh.
Hri kai enkawl dam, recovery rate hi 96.32% niin, khawvelah pawh a sang ber pawl a ni pha. Ni 15 chhung chu a zawnin hri kai enkawl lai hi nuai thum aiin an tlem tawh a ni. State zingah Maharashtra-ah Covid-19 vanga thi hi an tam ber a, mi 49,695 in an thihpui tawh. Tamil Nadu-ah 12,166, Karnataka-ah 12,110, Delhi-ah 10,597, West Bengal-ah 9,817, Uttar Pradesh-ah 8,413, Andhra Pradesh-ah 7,118 leh Punjab-ah 5,400 in hripui hi an thihpui tawh. Union health ministry chuan ram puma hripui vanga thi zinga 70% chuang natna benvawn nei niin a tarlang.