SC-in khawlai ui chungchanga thutlukna tidanglam

Supreme Court chuan khawlai ui khung hranna tur thupek a siam hnuah, ngenna hrang hrang thlen a nih avangin Delhi huam chhunga khawlai ui khung bona tur thupek, August 11 a tihchhuah tawh chu nimin khan a tidanglam. Thupek a siamṭhatah hian khawlai uite chu tihthianghlim leh vaccine pek an nih hnuah khawlaia chhuah leh turin a ti. Mahse, vantlang hmun leh khawlaia ei tur pek a khap a, tiluite chungah na taka hma lak a nih dawn thu a tarlang.

Judge pathum ṭhutna bench chuan hmalakna thar tur hi puangin, Delhi Municipal Corporation chu khawlai uite chaw pekna hmun tur, khawlai ui tamna leh bitna huam chhungah siam turin leh noticeboard hmanga vantlang mipui hriattir turin thupek a tichhuak. Hmalakna kalpuina tur hian hmanrua leh hmunhma ṭha a ngaih thu court hian tarlangin, dan bawhchhia report-na tur helpline siam turin a hriattir bawk.

Solicitor general Tushar Mehta, Delhi sorkar aiawhin data a tarlanah kumtin India-ah ui â hri vangin mi maktaduai 3.7 thihna a thleng a ni. World Health Organization (WHO) statistic chuan kumtin ui â hri vangin mi 20,000 thi ziah angin an tarlang thung. Mehta chu khawlai ui vang hian naupang tam tak khawlaia infiam thei lo an tam tual tual tih a sawi.

Congress party hruaitu Rahul Gandhi pawhin SC-in ui chungchang a ennawnna chu X-ah fakin," Supreme Court-in khawlai ui chungchanga a tlutlukna a ennawn chu a lawmawm ka ti a, ran tana hlawkna leh vantlang himna intluk tlanna atana hmalakna pawimawh tak a ni", a ti. Hmalakna thar chu ran leh mihring tana thil ṭha thlentu a ni ngei dawn a ni, a ti bawk.