DRDO-in hlawhtling takin air defence en chhin

Ram chhunga air defence huang thuam chak hna kalpui mekah, Defence Research and Development Organisation (DRDO) chuan Inrinni liamta khan Integrated Air Defence Weapon System (IADWS) thar chu Odisha tuipui kam bulah hlawhtling takin a enchhin.

DRDO tarlan danin IADWS hi multi-layered air defence system, ram chhunga siam vek niin amahah hian Quick Reaction Surface to Air Missiles (QRSAM), Advanced Very Short Range Air Defence System (VSHORADS) missiles leh high-power laser-based Directed Energy Weapon (DEW) a awm kim vek a ni. Heng bakah hian missile systems, drone detection, destruction system, weapon system command & control bakah communication leh radar a awm tel bawk.

Ralthuam enchhin hlawhtlinnaah hian defence minister Rajnath Singh chuan DRDO, Armed force leh Indian Defence Industry chu lawmpuina thawnin, air defence huang mai bakah hmelmate aṭanga van boruak kaltlanga beihna thleng thei lakah ram tan himna a thlen thei dawn tih a sawi.

Ministry of defence chuan August 20 khan hlawhtling takin Intermediate Range Ballistic Missile Agni-5 chu ITR Chandipur, Odisha-ah en chhinna an lo kalpui tawh a, hei hian ram chhunga ralthuam siamchhuah kawngah India hmasawnna nasa tak a tilang chiang hle tih ministry chuan a tarlang.