SC-in Vintara chhui turin SIT din

Supreme Court chuan Thawhṭanni khan Jamnagar, Gujarat-a Anant Ambani-a din ramsa hrang hrang enkawlna hmun, Vantara din a nih chungchanga thil dik tawk lo awm vanga complaint theh luh chhui chiang tur Special Investigation Team (STI) a din.

STI-ah hian SC judge hlui Justice J. Chelameswar chu chairman atan a ruat a, member atan Uttarakhand leh Telangana High Court-a chief justice hlui Justice Raghavendra Chauhan bakah Hemant Nagrale, IPS (Mumbai Police Commissioner hlui), leh Anish Gupta, IRS, Additional Commissioner, Customs-te ruat an ni.

Justices Pankaj Mithal leh P.B. Varale ṭhutna bench chuan Vantara-in dan lo leh dik lo taka ram pawn lam aṭanga India-a ramsa a lak luh dan leh, a enkawl dan dik tawk lo bakah, sum inthawn dan felhlel awm nia sawi, advocate Jaya Sukin-a petition theh luh pahnihte an ngaihtuah a ni. Court chuan petition theh luhte hi media report aṭanga siam a nih vangin mumal zawka chhui chiang tur leh dikna tarlang tur din a ṭul a ni, a ti.

SIT hian Vantara hmuna ramsa hrang hrang, India leh ram pawn aṭanga lei leh neihte a zirchiang dawn a, a bikin sai awmte chu Wild Life (Protection) Act, 1972 leh Rules for Zoo tlawhchhanin an endik ang. Hei bakah hian International Convention on Trade of Endangered Species of Flora and Fauna (CITES) hmangin ramsa awmte dinhmun chu endik vek tura tih a ni bawk.

Special team hian ramsa chungchang bakah ramsa lak luh a nih danah dan kalh a nih leh nih loh te, sum hman dante pawh an endik tel dawn a ni. Zirchianna neihte hi a rang thei anga kalpui tur niin, report hi September 12 hmaa theh lut tura tih an ni.