Sorkar laipuiin eiruk thubuai CBI chhuitir dawn CBI ngenna NE state te'n chhanglet lo

Rajasthan Chief Minister Vasundhara Raje leh Indian Premier League hotu hlui Lalit Modi te chungchanga tlang thu thangah Prime Minister Narendra Modi chuan eng mah la sawi lo mah se, Lalit Modi-a nena inzawmna nei Shimnit Utsch firm-a eiruk thubuai chu Central Bureau of Investigation (CBI) a chhuitir dawn.

Raje-in hian a vawi khatna atana kum 2003 aṭanga 2008 thlenga Rajasthan Chief Minister hna a chelh lai khan Shimnit Utsch firm hi a duhsak uchuak hle tiin an sawi.

Union Road Transport Sec­retary Vijay Chhibber chuan kum 2014, July 30-a thuchhuah a siamah hmarchhak state panga-te chu Shimnit Utsch firm-in high-security registration plate (HSRP) vuah man sang tak a lak chungchang chu CBI chhuitir turin a lo ngen tawh bawk.

Shimnit Utsch neitu Nitin Shah hi IPL hotu hlui Lalit Modi-a ṭhian hnai tak nia sawi a ni.

Hmarchhak state pangate hi Meghalaya, Mizoram, Sikkim, Nagaland leh Arunachal Pradesh te an ni a, Shimnit Utsch hian HSRP pakhat siam nan hian Rs 1,500-1,800 thleng a la ni. CBI chuan hemi chungchangah hian state tina official te pawh an inhnamhnawih an rin thu an tarlang a, hetihlai hian chhui tura an dilnaah erawh chhanna an la hmu lo thung.

"Min chhuitir tura hmarchhak state te hnena kan ngennaah chhanna kan la hmu lo a, mahse kan la bawhzui reng tho a ni," tiin CBI official chuan a sawi.

Nikuma Modi sorkar lakluh a nih aṭanga thla hnih hnu, July khan CBI hian Union Road Transport Secretary Chhibber hnen aṭangin Shimnit Utsch firm-in high-security number plate a vuah dan chungchang report kimchang a ngenna a dawng a ni.

Kum 2008 khan Rajasthan-a HSRP vuahna tur vaibelchhe 800 man contract Shimnit Utsch hnena a pek chungchangah Raje-i hian sawi a hlawh a nasa hle a, eptute chuan ILP hotu hlui Lalit Modi leh Raje te inthianṭhatna chu Shimnit Utsch hian contract hmuhna remchangah a hmang a ni, an ti. Rajasthan-ah hian Shimnit Utsch hian four-wheeler number plate-ah Rs 1,110 a la a, two-wheeler-ah Rs 650 a la.

Kum 2008 inthlanah Rajas­than Congress chuan number plate man to uchuak taka lak a nih avanga Shimnit Utsch con­tract tihtawp hi campaign au hlaah a hmang nghal a, Chief Minister Raje hian a tlak phah a, mahse kum 2013 assembly inthlanah a party BJP chuan hnehna a chang leh a ni.