Pak sipaite'n J&K-a BoP an kap leh

Pakistan sipaite chuan inkahhai thuthlung palzut lehin Pathianni khan Jammu and Kashmir, Jammu district-a India-Pakistan ramria Border Security Force te duty-na, Border Out Post (BoP) paruk an kap.

BSF officer chuan he thu hi sawiin, Pakistan sipaite chuan Jammu district, Arnia sector ramria BoP paruk chu bitumin, zan khuain silai an hmetpuak a ti a, BSF te pawhin an chhanlet nghal thu a sawi.

Pakistan sipaite chuan ralthuam te tham deuh an hman thu leh 82 mm mortar shell te pawh an kah chhuah thu sawiin, ramri chhehvela khaw mipuite'n an hlauhthawn thu BSF officer chuan a sawi bawk.

BSF te'n Pakistan sipaite silai kah an chhanlet hnu hian zing dar nga thleng an inkap zui a, mahse bungrua tihchhiat emaw sipai hliam tuar emaw an awm lo.

Jammu district-a India-Pakistan ramriah tun hnai khan Pakistan sipaite hian dar kar 12 chhungin inkahhai thuthlung vawi thum an palzut hman. Pakistan sipaite hian June 22 khan Jammu district, R S Pura sector-a BoP pahnih chu an lo kap leh tawh bawk.