President-in Lalit Modi lakah complaint thehlut

IPL Commissioner hlui Lalit Modi-a'n India President Pr­a­nab Mukherjee tihmual­phona thu Twitter-ah a tarlan avangin President leh a secretary Omita Paul chuan a lakah com­plaint an thehlut.

Complaint hi Pre­si­dent Secretariat aṭang­in Delhi Police Com­mis­sioner BS Bassi hnenah thehluh a ni a, Twit­ter-a Lalit Modi-a'n June 23 leh June 25-a a post screen shot pawh theh­luh tel nghal a ni bawk.

Enforcement Direc­torate-in sum chingpen thubuaia IPL hotu hlui Lalit Modi a chhuina phek 80-a chhah chu President hian complaint a thehluhah a thil tel bawk.

President Pranab-a'n UPA sorkara Finance Minister hna a chelh laiin Lalit Modi chuan IPL Cricket tournament neih dawna Kochi franchise chungchangah a lakah action la turin Pranab hian Enforcement Directorate a nawr tih a sawi a, hei vang hian Shashi Tharoor pawh Union Minister aṭangin a ban phah a ni, a ti.

President-in com­plaint a thehluh hi Po­lice Commissioner Bas­si chuan chhui zui tur­in Delhi Police-a Eco­­nomic Offences Wing-ah a thehlut tawh a, mahse a hma lakna erawh hriat zui a ni lo.

Twitter-a Lalit Mo­di-a thu post hi President leh a office zahawmna tibawrhbang thei a nih avangin Indian Penal Code section 499 leh 500 tlawhchhana thu­buai siam theih a ni em tih ngaihtuahin mi­thiam­te ngaihdan lak mek a ni, tiin official pakhat chuan a sawi thung.