Sorkarin bank dawrtute chhinchhiahna siam dawn

Sorkar laipui chuan bank hrang hranga pawisa lakchhuah tuma mi tam tak an buai laiin, dik lo taka thil lo tite hriatchhuah an nih theih nan vote thlak dawna ink hmanga a chhinchhiahna ang kha hman leh a tum.

Economic Affairs Secretary Shaktikant Das chuan he thil tih an tum chhan hi sawifiahin, bank aṭanga pawisa thleng leh lakchhuah duh intlar an tam a, hetih lai hian mi ṭhenkhat chuan an sum chheprelhte dah luh tumin vawi tam tak an intlar nawn a ni, a ti.

ìBank leh ATM-a mipui intlar an thui chhan pakhat chu mi pakhatin hmun hrang hrangah a sum la chhuak tura a intlar nawn fo vang a ni. Hei bakah hian sum chheprelh eng emaw zat chu bank-a dahluh leh thleng tumin, midangte an chhawr kual ṭhin tih report pawh kan dawng telî tiin Das chuan news conference-ah a sawi. Hetiang buaina chinfelna kawng khat atan hian vote thlak turte chhinchhiahna ink ang kha cash counter-ah hman a ni dawn tih a sawi a, nimin vek khan khawpui lian ṭhenkhatah chuan an hmang ṭan nghal a ni.

Das chuan social media lam a, pawisa nawi thleng tur a tam tawk lo nia sawite chu lo awih lo turin mipuite a ngen a, mamawh tawk a awm thu sawiin, mipuite tichiai zawnga thu theh lo turin a ngen bawk.

Kerala police-te chuan nimin khan Ernakulam district-a bus pakhatah mi pakhat hnen aṭangin pawisa fai, cheng nuai 61.98 an man. Pawisa an man zingah nuai 60 chu Rs 1,000 note a ni a, a dang chu Rs 50 note a ni. Pawisa kawltu hian document engmah a nei tel lo tih sawiin, a pawisa kawl an mante hi enfiah turin bank-ah thawn nghal a ni.