SC-in pawisa tih thih dang tura ngenna hnawl

Supreme Court chuan sorkar laipuiin Rs 500 leh Rs 1,000 note a tih thih chungchanga petition thehluh chu nimin khan a ngaihtuah a, pawisa note tih thih sut tir emaw, tihkhawtlai tir emaw tura ngenna a hnawl a, hmei rual hian mipuite harsatna tawh mek sukiang tura sorkar laipuiin ruahmanna a siamte thehlut turin a hrilh.

SC chuan sorkar laipui economic policy-ah inrawlh a tum loh thu a sawi a, mahse mipui nawlpuite harsatna chhawk a nih theih dan chu a ngaihtuah tur thu a sawi. Court chuan sorkar laipui hnenah mipuiten sum an lakchhuah theih zat tihpun dan chu ngaihtuah turin a ngen a ni.

Nimin thleng khan bank leh ATM hrang hrangah pawisa thleng tum leh lakchhuah tum an la intlar thui thei hle. Sorkar laipui chuan mi pakhatin pawisa note hlui a thleng theih zat hi Rs 4,500-ah a tisang tawh a, account aṭanga pawisa lakchhuah theih zat pawh kar kalta khan Rs 24,000 niin, ATM aṭangin card pakhat hmangin Rs 2,500-ah tihsan a ni tawh bawk.

Rs 500 leh Rs 1,000 tih thih a nih hnuah bank hrang hranga pawisa deposit chu cheng tluklehdingawn 45 dawn a tling tawh a ni.

Hetih lai hian Kereala-a co-operative bank chuan sorkar laipuiin pawisa note a tih thih avang hian Thawhṭanni khan High Court-ah petition a thehlut. Petition hi Kalletumkara Service Co-operative Bank-in Union Finance Ministry, RBI, RBI Regional Office leh Registrar of Co-operative Societies, Thiruvanathapuram lakah thehlut a ni a, Ningani hian ngaihtuah a ni ang.