Ramchhung Lawrkhawm

Akhilesh-a’n friendship car rally vailiam

Uttar Pradesh Chief Minister Akhilesh Yadav-a chuan nimin khan Lucknow-ah India-Myanmar-Thailand Friendship Motor Car Rally a vailiam.

He rally hi Pathianni khan Delhi-ah ṭan a ni a, December 3 khian Thailand khawpui, Bangkok-ah a tawp ang. Ram pathumte hian Motor Vehicle Agreement siam tumin hma an la mek a, he inremna pawimawhzia lantirna kawng khat atan rally hi buatsaih a ni. Vehicle agreement hi ram pathumte inkarah bungraw phur leh khualzin phur motor-ten inkalpawhna ṭha zawk an neih theihna tura ruahmanna a ni.

J&K-ah ramri bula school-te khar

Pakistan sipaiten Indian post-te an beih leh avangin, nimin khan Jammu and Kashmir-a border area-a school-te khar an ni.

Thuneitute chuan Jammu, Samba leh Kathua district-a International Border bul khuaa school 174 an khar a, naupangte himna atana ti an nih thu an sawi. Pakistan sipaite hian International Border (IB) leh Line of Control (LoC)-a inkahhai thuthlung siam chu vawi tam tak palzutin, India lam hawiin silai an hmetpuak a, civil mite chenna bialte an kap tel a ni.

Delhi HC-in burqa khap tura ngenna hnawl

Delhi High Court chuan khawpui chhung Muslim hmeichhiaten an hmai an khuhna, burqa hman khap tura ngenna a hnawl.

Vantlang punkhawmna hmuna burqa leh hmai khuhna dang hman hi mipuite himna atan a hlauhthawnawm thei nia sawiin PIL thehluh a ni. Mahse Chief Justice G Rohini leh Justice Sangeeta Dinghra Sehgal awmna bench chuan hei hi ngaihtuahin, a ṭul a nih chuan sorkarin a ngaihtuah zawk mai dawn niin an sawi. PIL thehluha khap tura ngen zingah hian burqa bakah, helmet leh hood te p awh a tel a, hengte hi sorkar building pawimawhahte firfiakten pawikhawihna thlen tura inthupna atan an hmang thei niin an sawi.