Armed forces-te hun rei zawk atan pawh an inpeih tur a ni : R.Singh

Defence minister Rajnath Singh chuan nimin khan Army War College, Mhow, Madhya Pradesh-ah 'Ran Samvad' a hman pui a, armed forces-te chu hun rei lote chhung emaw kum nga daih indona emaw pawh thleng thei lakah venhim hna thawk turin an inpeih tur a ni, a ti.

'Ran Samvad' hman mek hi ram chhunga tri service - Army, Navy, leh Air Force huanga conference lian niin indona leh indona lam kaihhhnawih thil hrang hrang inzirtirna neih a ni. Conference-ah hian sipai hotu Chief of Defence Staff Gen. Anil Chauhan, Air Chief Marshal A.P. Singh leh Navy Chief Admiral Dinesh K. Tripathi ten an telpui a ni.

Minister Singh hian India sipai hrang hranga thawktute chu Operation Sindoor kalpui a nih laia an hnathawh danah a fak hle a, a hlawhtlinna chu sipai tha chakna bakah India tualchhung hmanrua leh ralthuam te niin, India indo thiamna tilangtu a nih thu a sawi. Operation Sindoor chu khawvel hmaa India chak zia pholangtu a ni tih a sawi lang bawk.

Defence minister chuan India chu indona cho chhuak ṭhintu a nih loh thu leh mi dang dip dal zawnga awm duh lo ram a nih thu a sawi a, hetih rual hian amah dipdaltu leh dotute lakah erawh tlanchhiat a tum ngai lo, a ti. Tunlai indona chu ralthuam mai ni loin cyber leh artificial intelligence te, satellite-based surveilance hmangtea thleng ṭhin a nih avanga inpeih reng a ṭul thu Singh chuan sipai hmaah a sawi.