India-in FIDE World Cup thlen inpeih : PM Modi

Prime minister Narendra Modi chuan nimin, Nilaini khan India chu International Chess Federation (FIDE) Chess World Cup 2025 ngaihhlut tak thleng turin a inpeih tih a sawi.

PM hian X kaltlangin India-in kum 20 chuang liam hnua India-in Chess World Cup a thleng leh thei tur chu lawmawm a tih thu a sawi. India-in he tournament a thlen hnuhnung ber chu kum 2002 daih tawh khan a ni.

India-ah hian tun dinhmunah ram chhung mi chess top player eng emaw zat title nei an awm mek a, kum 2002-a India-in a thlen ṭum khan Viswanathan Anand chu champion a lo ni tawh nghe nghe bawk. PM hian ṭhangtharte zingah chess a lar hle tih sawiin, tournament kaltlang hian player ṭha tak tak khawvelah phochhuah a ni thei dawn a ni, a ti bawk.

Kumin FIDE World Cup hi Goa-ah neih tura tih niin October 30 aṭanga November 27 thleng a awh ang. Tournament-ah hian lawmman atan USD mtd 2 ruahman a ni a, inelna kaltlang hian nakkuma World Championship aiawh tur pathum thlan chhuah an ni dawn a ni. Inelnaa tel tur mi 206 an inziaklut tawh a, an zingah hian world champion D Gukesh, Magnus Carlsen, Fabiano Caruana leh R Praggnanandhaa-te pawh an tel.