2038-ah khawvela economy lian pahnihna India a nih hman beisei

Indian economy zirchiangtu, Ernst & Young (EY ) Economy Watch-in August 2025 edition report a tihchhuahah India economy chuan kum 2030-ah USD tld 20.7 a tlin hman dawn bakah kum 2038-ah USD tld 34.2 hu a tling hman dawn tih a tarlang. EY tarlan ang hi a thleng a nih chuan kum 2038-ah India chu khawvela economy lian ram pahnihna a ni pha dawn a ni.

Economy dinhmun sawh nghehna tur hian India chan a ṭha hle a, ram mipui cheng zingah ṭhalai, kum 28.8 bawr chu mihring cheng tam ber a ni. Hei bakah saving leh investment rate a ṭhan laia sorkar GDP leiba a tlakhniam bawk avangin ram dang economy liante khumin kum 13 hnuah chuan economy lian pahnihna a nih theih phahna chhan tur niin an tarlang.

Tun dinhmunah India chu khawvela ram hausa palina a ni mek a, kum 2030 hnu lamah chuan US nen economy ṭhan lamah an inel tawk viau tura ngaih a ni. India hian US economy chu PPP term-ah kum 2038-ah a khum thei tura ngaih a ni. Kum 2030-ah chuan economy lian zawk Japan leh Germany chuan hma an sawn nep tura rin a ni a, hengte hi kum upa tam leh global trade-a innghat an nih vang niin tarlan a ni bawk.

India hian GST, Insolvency and Bankruptcy Code (IBC), UPI-driven financial inclusion, leh production-linked incentives (PLI) hmangin industry hrang hrang in elnaah hmasawnna a neih nasat phah a, hei vang hian kum 2028-ah chuan Germany khumin khawvel economy lian pathumna a ni thei dawn tih report chuan a tarlang.