India-in Japan leh China thawhpuina ṭha siam chhunzawm zel
Prime minister Narendra Modi chu Japan leh China tlawhin kar liamta khan a zin a, a cham chhungin ram pahnihte nen kawng hrang hranga thawh dunna tur inremna an nei. PM Modi hian Japan tlawh hmasain Japan prime minister Shigeru Ishiba nen an inbia a. Japan aṭangin Tianjin, China-ah Shanghai Cooperation Organisation (SCO) summit hmang turin a kal leh nghal a ni.
Japan nen hian transport, space exploration, leh economics huanga thawh dunna ṭha siam tum a ni. Indian Space Research Organisation (ISRO) leh Japan Aerospace Exploration Agency (JAXA) chu Chandrayaan-5 mission lo awm tur atana thawh dun tum. PM hian Zirtawpni khan Ishiba nen bullet train-ah chuangin, Japan puihna hmanga Mumbai-Ahmedabad inkara bullet train tlan tir tura rel khalhtute Japan-a training neih chungchangte an sawi dun.
Heng bakah hian Japan chuan India-ah private investment 10 Trillion yen hu, kum 10 lo awm tur chhunga tih an intiam bawk. Hei hian semiconductor, rare earth, digital technology leh clean energy huangah investment a tihzauh theih beisei a ni. PM chuan Tokyo Electron Miyagi Ltd (TEL Miyagi), khawvela semiconductor thawn chhuak tam ber a tlawh nghal a, Japan nena semiconductor huanga thawh dunna tihchak chu thil pawimawh tak a nih thu a sawi.
China-ah direct flight service leh dawn
China-a Shanghai Cooperation Organisation (SCO) summit hmang tura cham mek, PM Modi chu nimin Pathianni khan China president Xi Jinping nen inbia in, Modi chuan China-ah direct flight thlawh tir leh a nih tur thu a sawi. Hei bakah hian thawh dunna 'rintlak, ram pahnih pawm ve ve' neih an remti a, ramria harsatna tihtawp, leh global trade ngelnghet siam turin an intiam bawk.
Inbiaknaah hian PM chuan China nena inremna neih chhunzawm tura India a inpek thute sawi. Hruaitu pahnihte hian India-China inkar tihṭhat leh tihhmasawn chu nikum October Kazan meeting-ah khan remtih a nih tawh thu an sawi.
India leh China hruaitute inbiakna hrang hrang kimchang hi tarlan a la ni lo a, US-in India laka chhiah a tihsan hnuah ram pahnih inkar boruak hi a ṭha chho mek a ni.
PM-in '125th Mann Ki Baat' hlawhtling takin nei
Prime minister Narendra Modi-a'n thla tina radio kaltlanga thu a sawi ṭhin, Mann Ki Baat vawi 125-na chu nimin khan hlawhtling taka neih leh a ni. PM chuan Mann Ki Baat kaltlang hian mipuite chu festival season lo thleng turah “swadeshi (‘Made in India’)”, ram chhung siam chhuah ngei chu ngaisang turin a chah a, tualchhunga thilsiam thlawp chuan “Aatmanirbhar Bharat (mahni kea ding)” hlawhtlinna a thlen thei dawn niin a sawi.
PM chuan nitin mamawhte chu 'Made in India' a ni tur a ni ti8in, US chhiah tihsan a nihna hian mahni kea din a pawimawh zia a ti lang nawn leh a ni, a ti. Vladivostok, Russia a exibition neihah naupang lemziah hmanga 'Ramayana' tarlan a nih chungchang pawh sawi chhuakin, India nunphung khawvel hmun hrang hranga pholan tam a ni chuan thinlung a khawih hle a ni, a ti.