BJP-in Dalit leh hnam hnuaihnungte vote an ruksak : Rahul Gandhi

Congress party hruaitu, Rahul Gandhi chuan Inrinni liam taa “Voter Adhikar Yatra” Ara, Bihar-a neihah BJP chuan Dalit leh hnam hnuaihnung zawkte chu Special Intensive Revision (SIR) hmangin inthlan hmabak Bihar-ah vote an ruksak a ni, a ti. Congress chuan BJP, RSS leh election commission chu ‘vote chori’(theft) ah an puh a ni.

Rahul chuan SIR chu ramchhunga demoracy kalphung leh constitution palzutna a ni, tiin Dalits, hnam hnuaihnung leh hmeichhiate chuan vote an thlak chu an dikna chanvo a nih thu a sawi. Mahse, Modi sorkar chuan inthlana hnehna an chan theih nan vote-te a ruksak zawk niin a tarlang. BJP chuan Maharashtra, Haryana leh hmun dang dangah vote an ru a, mahse, finfiahna kan neih ṭhat loh avangin kan ngawi a, tunah chuan kan nei tawh a hma kan la a ni, a ti bawk.

Rorel lai sorkar chuan sumdawng hausa leh corporate house Adani leh Ambani te a duhsak bik an ni, tiin Rahul chuan a sawi. PM Modi sorkar chuan public sector pawh privatise an tum thu leh, hei hian mi hausa leh corporate house-te hlawkna chauh a thlen dawn tih a sawi.