CBI eiruk thubuai chhui zinga 7,000 chuang tihkhawtlai awm

Central Vigilance Commission (CVC) annual report tihchhuah tharah, Central Bureau of Investigation (CBI) in eiruk thubuai a chhui zinga 7,072 chu high court hrang hrangah tihkhawtlai mek a ni tih a tarlang. Heng thubuai tihkhawtlai zinga 379 chu kum 20 chuang an ni tawh.

CVC chuan December 31, 2024 thleng khan CBI thubuai chhui zinga 1,506 chu kum thum la tling lo tihkhawtlai niin, kum 3-5 tihkhawtlai tawh 791 leh kum 5 chuang tihkhatlai 2,115 an awm tih a tarlang. Eiruk thubuai kum 10 chuang tihkhawtlai hi 2,281 an awm tling bawk. Thubuai 606 chu kum 20 chuang tihkhawtlai an ni tawh a ni.

Report chuan heng thubuai hrang hrangah hian CBI leh thubuai siamsakten ennawn leh tura ngenna an thehluh 13,100 a awm niin a tarlang.

Kum 2024 khan CBI thubuai chhui zinga 644 chu chinfel niin, heng zinga 399-ah thubuai neitu chu thiam loh chantir a ni a, thiam chantir 154 awmin, chhan dang vanga tihtawp 77 a awm a ni. Nikum chhunga thubuai chinfel zinga thiam loh chantir zat chu 69.14% a ni a, a kum hmasa khan 71.47% a ni.

Kum 2024 kumtawp thleng khan court case hrang hrang, non-corruption case pawh telin chinfel loh 11,384 a awm.

CBI hian nikum chhung khan eiruk thubuai 807 a ziak lut a, heng zinga 111 chu constitutional court thupek anga a chhui niin, state leh UT sorkar ngenna anga a chhui 61 an awm bawk a ni. Prevention of Corruption Act hnuaiah thubuai 502 ziah luh a ni a, hengah hian sorkar hnathawk 859 inhnamhnawhin an zinga 221 chu gazetted officer an ni. Kum 2024-ah thubuai chhui zawh 1,005 neiin, heng zingah hian regular case 856 a tel.