Sorkarin Adivasi ṭawng lehlinna app tlangzarh

Sorkar laipui chuan nimin khan artificial-intelligence hmanga siam, Adivasi ṭawng lehlin theihna tur app Aadi Vaani a tlangzarh. App thar hmang hian Adivasi ṭawng chi ruk Bhili (Bhil), Mundari (Munda), Gondi (Gond), Santali (Santal), Kui (Kandha ), leh Garo (Garo) ṭawngte chu Hindi leh English a lehlin theih a nih tur thu official chuan an tarlang.

Ṭawng lehlinna app hi Tribal Affairs Ministry hnuaiah ram chhunga tribal research institute hrang hrang IIT Delhi, BITS Pilani, IIITs Hyderabad leh Naya Raipur thawk hoa duan a ni. App kaltlang hian thuziak leh thusawite lehlin theih tura tih a nih bakah optical character recognition (OCR) manuscripts leh leh oral tradition pawh letling thei tura duan a ni bawk.

Aadi Vaani hmanga ṭawng lehlin theih zingah Bhili chu hman tlanglawn ber niin kum 2011 census aṭanga a lan danin Rajasthan, Madhya Pradesh, Maharashtra, leh Gujarat-ah mi vaibelchhe 1.04 hmangtu an awm. Santali chuan dawtin Jharkhand, West Bengal, Odisha, Bihar, leh Assam-ah hmangtu mi nuai 73.68 awmin, Gondi erawh Chhattisgarh, Madhya Pradesh, Andhra Pradesh, leh Maharashtra-ah mi nuai 29.84 hmangtu an awm ve thung.

Ministry official chuan app siam a nih theihna tur hian AI model hrang hrang chu train a nih thu leh, enchhinna hrang hrang pawh kalpui a nih thu an tarlang. App beta version hi Google Play Store leh Apple App Store-ah te hman theih turin dah chhuah a ni dawn tih Tribal Affairs Ministry chuan a sawi.