SIR chungchanga Congress complaint nuai 89 ECI-in hnawl : Pawan Khera

All India Congress Committee-a media and publicity department chairperson Pawan Khera chuan Pathiannia state headquarters-a thuthar lakhawmtute a kawmnaah, Congress party-in Special Intesive Revision(SIR) Bihar-a kalpui kaihhnawiha Election Commission of India (ECI) hnena complaint nuai 89 an theh luh chu ECI chuan complaint engmah awm lo anga an tarlan thu a sawi.

Khera chuan," ECI chuan thuthar dang tichhuakin political party aṭangin SIR chungchangah complaint awm lo angin an sawi. Mahse, Congress party chuan SIR kalpuina dik lo awm vang hian complaint nuai 89 chu ECI hnenah hian kan theh lut a ni" a ti. Voter tihbo zingah booth 7,613 aṭanga paih 75% leh boot 635 a pem tawh anga an sawi 75% chu hmeichhia an nih thu Khera hian tarlang bawk.

ECI chuan Congress-in complaint an theh luh thu an sawi hnu hian booth-level agent huangah Bihar-a Congress party chuan roll-a awm dilna (Form 6) leh roll-a paih dilna (Form 7) chu August 1-a draft roll tihchhuah a nih hnuah an la thehlut lo niin an sawi ve thung. ECI hian draft roll tihchhuah tirh khan roll-a awm 20% chu awm hmun sawn vanga paih an nih tur thu an sawi tawh bawk a ni.

Congress chuan roll-a dik lo taka voter dah luh an duh loh thu leh a dik ngeite dah luh erawh an duh thu an sawi rualin, dik lo taka dah luh leh paih chu an do tlat tur thu an sawi bawk. Hei bakah hian Congress chuan voter pakhat hnenah EPIC(elector photo identity card) number pahnih pek chhuah eng emaw zat a awm niin an tarlang.