Kum 5 chhung atan Naik-a pawl dan pawnah hnawl

Sorkar laipui chuan Islamic zirtirtu Zakir Naik-a NGO, Islamic Research Foundation (IRF) chu anti-terror law hnuaiah kum nga chhung atan dan pawnah a hnawl.

IRF dan pawna hnawl tur chungchang hi Prime Minister Narendra Modi-a kaihhruaiin union cabinet chuan a ngaihtuah a, a pawm ta tih Home Ministry chuan a tarlang. Hemi chungchangah hi ministry lam chuan official thuchhuah a tichhuak thuai dawn tih a sawi bawk.

Home Ministry-in a chhui chiannaah, Naik-a NGO hi international Islamic channel, firfiaka chetna thlawptu nia puh, Peace TV nen inzawmna ṭha tak an nei tih hmuhchhuah a nih thu official chuan a sawi. IRF hotu, Zaik-a hi firfiakte chawk phur leh, pawikhawihna thlen tura fuih zawnga
ṭum eng emaw zat thu sawiah puh a ni bawk.

Maharashtra Police-te chuan Naik hi ṭhalaite firfiaka che tura fuiha puhna chungchangah criminal case an siamsawk tawh a ni.

Naik-a hian IRF-in ram dang aṭanga ṭanpuina sum a dawnte chu Peace TV-a programme kalpuina atan a pawtpeng ṭhin a, heng programme tam zawk hi India ramah siam niin a thusawi te tihlan a ni a, Muslim-te chu firfiaka che turin a fuih
ṭhin nia sawi a ni. Naik-a enkawl educational trust chu ramdang aṭanga sum dawn khapsak a ni tawh bawk a, an hnathawh dante enfiah mek a ni.

UK leh Canada chuan Naik-a hi sakhaw dangte bei tura Muslim-te fuih phur zawnga thu a sawi avangin an rama kal an khap bawk. Hetih lai hian Bangladesh-ah erawh chuan a lar hle thung.