Loneituten vawiinah tractor rally neih tum

Sorkar laipuiin farm law pathum a siam thar duh lohna lantira hun rei tak nawrh huaihawt tawh, loneitute chuan vawiin hian dan siam tharte sut leh tura an phutna lantirin Delhi border paliah tractor rally neih an tum. 

Loneitute leh sorkar aiawhte hi inremna kawng zawngin ṭum eng emaw zat an inbe tawh a, mahse sorkar lam hian loneitute thil phut hi a vaiin a la pawmsak thei lo a ni. Farm law pathumte chu sut leh vek turin loneitu lam hian an phut a, mahse sorkar chuan sut a tum lo thung. Naktukah inbiakna hi an nei leh ang. 

Sorkarin an thil phut a tihlawhtling lo a nih chuan loneitute hian Republic Day, January 26 hian Delhi khawpui chhungah tractor rally huaihawt an tum thu an lo sawi tawh a, vawiina border-a rally an neih tur hi a 'trailer' niin an sawi. Kar hnih chhung chu an thil phut nawr nan hian nasa zawka beih an tum thu pawh an sawi a ni.

Thawhṭanni khan sorkar laipui leh loneitu pawl 41 aiawhte chuan a vawi sarihna atan  Vigyan Bhawan, New Delhi-ah inbiakna an nei a, inbiakna an neih zawha thuthar thehdarhtute'n an kawmnaah Agriculture Minister Narendra Singh Tomar chuan farm law thar pathum chungchang chu sawi mah se inremna an la siam thei lo tih a sawi.

Narendra Singh Tomar chuan January 8, naktukah hian inbiakna an nei leh dawn tih a sawi a ni. Thawṭannia inbiakna an neihnaah hian Union Agriculture Minister Narendra Singh Tomar, Commerce and Industry Minister Piyush Goyal and Minister of State for Commerce and Industry Som Prakash-te an tel.