AAP-in Delhi-ah kawngzawh huaihawt

Sorkar laipuiin Rs 500 leh Rs 1,000 note a tih thihin mipuite tana harsatna nasa tak a thlen avanga lungawi loin, nimin khan Aam Aadmi Party (AAP) huaihawtin Delhi-ah kawngzawh a ni. Kawngzawhnaah hian AAP Convenor leh Delhi Chief Minister Arvind Kejriwal bakah West Bengal Chief Minister Mamata Banerjee-te'n thu an sawi.

Rally hi thlai leh thei wholesale-na hmunpui, Azadpur Mandi-ah neih a ni. Pawisa note tih thih avanga harsatna hrang hrang tawkte chu tel vek turin a hmain an lo sawm tawh a ni.

Mamata Banerjee-i chuan sorkar laipuiin pawisa note a tih thih avanga ram mipuiten harsatna an tawh mek chu emergency hunlai ai pawhin a nasa zawk a ni tiin, a tuar nasa ber chu mi narante an ni, a ti. Ni thum chhunga sorkar-in a thu a sut loh chuan nasa zawka nawrh huaihawt an tum thu a sawi. Sorkar laipui chuan thu mumal nei loah puhin, pawisa note a tih thih hnuah nitin thuchhuah dang nei zelah a puh a, pawisa note hlui thleng theih zat a tihhniam leh chhan a zawt nghal bawk.

Arvind Kejriwal-a pawhin pawisa tih thih chuan nitin khaw-sakna thlengin a nghawng buai a, mi tam takin an ei leh in tur leina kawngah harsatna an tawh phah a ni, a ti. Kejriwal-a hian President Pranab Mukherjee hnenah sorkar laipui chu pawisa note a tih thih hi sut tura nawr turin alo ngen tawh bawk.

Chennai-ah pawh nimin vek han Communist Party of India (CPI) huaihawtin sorkar laipui laka lungawi lohna lantirin kawngzawh a ni. CPI worker-te chuan black money chu an duh bik lo tih an sawi a, hemi rual hian pawisa note tih thih chungchanga sorkar laipuiin mipui nawlpuite buaina nasa zawk thlen tura hmanhmawh taka thutlukna a siam chu an duh loh tih an sawi.

Tamil Nadu sorkar chuan pawisa note thi vang hian state sorkar hnuaia Apex Cooperative bank chuan a tuar nasa hle tih a sawi a, an bank hnuaia customer nuai 50 vel an neih zinga 90% chu loneitute an ni, a ti. Ni li chhung zet chu Co-operative bank-ah pawisa thawnkual theih a ni lo a, hei hian loneitute buaina a thlen nasa hle tih a tarlang.