Parliament in hnih inkhawm titawp

Nimina Rajya Sabha leh Lok Sabha rorel inkhawm chu sorkar laipuiin Rs 500 leh Rs 1,000 note a tih thih chungchanga rorellai leh eptu member-te inhnialbuai avangin tihtawp a ni.

Parliament thlasik ṭhut-khawm hi Nilaini aṭang khan ṭan a ni a, rorel inkhawm ṭanni aṭang hian Rajysa Sabha-ah chuan pawisa note tih thih chungchangah debate neih a ni. Eptute party chuan sorkar laipui chu sawiselin, he thilin a nghawng nat ber leh harsatna tawkte chu mi naran leh mi rethei zawkte an ni, an ti.

Congress vice president Rahul Gandhi chuan, BJP kaihhruai NDA sorkarin pawisa note a tih thih avanga hian PM Modi-a ṭhian ṭha sumdawng lian te chu, bank leh ATM aṭanga pawisa thleng leh lakchhuah tura intlar buai ngaiin an awm ve lo tih sawiin, mi rethei zawkten an tuar niin a sawi. Rajya Sabha-ah hian member-te inhnial bengchhen avang hian nimin tlai dar 2:05 khan inkawm tihtawp a ni.

Lok Sabha inkhawmah pawh eptu lam chuan pawisa note tih thih chungchangah debate nei a nih theih nan vote lak an phut a, mahse sorkar lamin a pawm theih loh avangin nimin rorel inkhawm pawh tihtawp a ngaih phah. Rorel inkhawm
ṭan veleh Trinamool Congress hruaitu Sudip Bandhyopadhyay chuan an party-in adjourment motion put luh an duh thu a sawi a, Congress party hruaitu Mallikarjun Kharge chuan hei hi an thlawp thu sawiin, 'Mipuiten harsatna hrang hrang an tawh te, ramchhung sum chetvel thlenga a nghawng buai dante, sorakrin mipuite buaina a chinfel sak theih loh chungchangte hi sawiho kan duh a ni" a ti. Mahse House Speaker Sumitra Mahajan-i'n eptute thil phut hi a remtih loh avangin eptu member-te hi House laiah chhuak khawmin bengchheng an siam a, rorel chhunzawm theih a nih loh avangin inkhawm hi tihtawp a ni ta a ni.