PM Modi-a'n 'Semicon India-2025' hawng

Prime minister Narendra Modi chuan nimin khan Yashobhoomi, New Delhi-ah ni thum awh tur 'Semicon India - 2025' a hawng. Semicon India hi semiconductor siam chhuah kawnga India hmasawnna thlen thei tura ruahman a ni a; India hmun hrang hran aṭangin semiconductor industry CEO ṭhahnem tak leh zirlai an tel bakah, rampawn aṭangin chhimtu eng emaw zat an tel.

PM Modi chuan India in semiconductor siamchhuah kawnga hmasawn a tumna hrang hrang a tarlang a," Khawvel chuan India hi an ring tawk a, India-ah an innghat ngam a, chumai bakah India chu hmalam huna semiconductor hmunpuia siam an duh a ni," a ti. Modi chuan hawnna huna rampawn aṭanga chhimtute chu thawhpui pawimawh tak an ni, a ti bawk.

Kumin first quarter-a India GDP ṭhanna tihchhuah thar chungchang sawiin, Modi chuan India-in beisei, ruahman, leh rinlawk zawng zawngte chu a khum vek thu a sawi. India hi kumin Q-1 chhung khan 7.8% a a ṭhan thu a tarlang a, GDP a ṭhanna hi sector zawng zawng manufacturing, services, agriculture, leh construction-ah te a pun vek thu a sawi.

Semiconductor huanga India hmasawnna turin sorkar chuan design-linked incentive (DLI) scheme ruangam thar a buaipui mek thu Modi chuan a sawi. Kum 2001-a scheme tlangzarh a nih khan Rs vbc 76,000 sum ruahman aṭangin semiconductor plant 10 siamna a pawmpui tawh a, hengte hi fabrication pahnih leh packaging leh testing facilities pariat an ni. Scheme thar atan hian USD tld 15 hu vel ruahman a nih rin a ni bawk.