Delhi-ah Turkey thlawhtheihna emergency-in ṭumtir

Turkey thlawhtheihna, flight TK-65 chu thlawhtheihna chhungah bomb a awm nia thu ziak hmuh a nih avangin nimin khan New Delhi-a Indira Gandhi International Airport-ah emergency-a ṭum tir a ni.

Thlawhtheihnaah hian khual­zin 148 an chuang a, Bangkok aṭanga Istanbul pana thlawk a ni. Thawhtheihnaa thawktu zinga pakhat chuan toilet-a darthlalangah, lipstick hmanga 'bungraw awmna hmunah bomb a awm' tih inziak a hmuh avangin, pilot chuan Nagpur Air Traffic Controller a be nghal a, Delhi airport-ah ṭum tir an ni ta a ni.

Intelligence leh security agency joint team chuan thlawh­theihnaa chuangte hi an vaiin thu an zawtfiah vek dawn a, darthlalanga thu ziahna atana lip­stick hman pawh an bungraw zinga a mil an zawng nghal bawk ang.

Intelligence Bureau leh Research and Analysis Wing joint team chuan khual­zinte chanchin an chhui chiang dawn a, Home Minister leh Home Secretary pawhin Ministry of Home Affairs-ah high level meeting neiin, hetah hian IB Director pawh a tel dawn a ni.

Security agency-te chuan bomb a awm thu ziaktu hian khualzinte tichiai a, thlawh­theihna hi hruaikawi a tum pawh a ni thei tiin an sawi.

Khualzin leh thlawhtheihnaa thawktute hi chhuahtir vek an nih hnuah, uluk takin thlawhtheihna chhung pawh hi enfiah vek a ni a, bomb erawh hmuh a ni lo.

Airport-ah hian emergency puan nghal a ni a, kangṭhelhtute koh luh niin, National Security Guard hnuaah bomb disposal squad leh dog squad-te pawh runway-ah koh luh nghal an ni. Thlawhtheihna hi IGI airport-ah hian dah hran nghal a ni.