Vyapam scam: SC-in Digvijay Singh ngenna a ngaihtuah dawn

Supreme Court chuan Congress hruaitu, Dig­vijay Singh-a'n Vyapam scam chungchang Central Bureau of Investigation (CBI) chhui tir tura a ngenna chu ngaihtuah a remti a, naktukah ngaihtuah a ni ang.

Madhya Pradesh Pro­fessional Examination Board (MPPEB)-in entrance exam kaltlanga ad­mis­sion ti thei tur can­didate leh sorkar hna ṭhenkhat a lak dana dik lo taka thiltih nia sawi, Vyapam chungchang hian tunlaiin thawm a nei lian hle. Dik lo taka thiltihnaah hian cheng vaibelchhe tel a inrawlh nia sawi a ni a, hei bakah hian he thila inhnamhnawiha puh leh thuhretu mi sawmli chuang zet chu mak tak maiin an thi a ni.

Digvijay Singh hian SC-a petition a theh­luhah, Vyapam scam chung­chang finfiahna a neihte Madhya Pradesh High Court leh Special Inves­tigation Team-in siam chawp nia a puhsak chu hnawl turin a ngen a, hei bakah hian dik lo taka thil kalpui a nih dan te, a inhnamhnawihte mak taka an thih dante chu CBI chhuitir a phut a ni.

Supreme Court hian Singh-a ngenna bakah, Vyapam scam kaih­hnawih­a PIL thehluh dang eng emaw zat chu a ngaihtuah nghal ang. Heng zingah hian Madhya Pradesh Gover­nor Ram Naresh Yadav ban tura phutna pawh a tel.

Petition thehluttu ṭhen­khat chuan MPPEB thil tih dan chu court hriat­puina hnuaiah inde­pen­dent investigation neih an phut a, mahse Union Home Minister Raj­nath Singh chuan court thupek tihchhuah a nih hma chuan sorkar laipuiin CBI chu chhui turin thu a pe dawn lo tih a sawi.