UK prime minister-in India ram zin a ṭhulh

January 26-a India Republic Day lawmnaa khuallian tura sawm, United Kingdom prime minister Boris Johnson chuan an rama Covid-19 hri ṭai darh nasa avangin a zin tum a ṭhulh.

Nimin khan Downing Street thupuangtu chuan, "Tukin khan kan prime minister hian India prime minister Narendra Modi a bia a, tun thla tawp lama zin a tum a ṭhulh thu hi a hrilh a ni," a ti. Tun hnaiah UK-ah hian Covid-19 a ṭai darh nasa hle a, hei vang hian Boris hian an rama harsatna a awmlaia hmun danga zin chu ṭha a ti lo a, "Nizanah mai ram pum huap lockdown puan a ni a, coronavirus chi thar hmuh chhuah hi a ṭai darh chak bawk nen, tun ang hun harsaah hian UK-a awm a, a ṭul ang apiang tih nghal zung zung hi prime minister hian a duh a ni," tiin a thupuangtu chuan a sawi.