Finance minister hoin 56th GST council meeting neih a ni

56th Goods and Services Tax council meeting chu nimin khan union finance minister Nirmala Sitharaman kaihhruainain state leh UT hrang hrang a finance minister-te nen New Delhi-ah neih a ni. Meeting-ah hian 'next gen' GST reform chungchang ngaihtuah a ni a, ramchhunga bungrua leh product hrang hranga chhiah lak dan thlak danglamna tur sawi ho a ni. GST thar duan hi September 22 aṭanga hman ṭan theih beisei a ni.

Meeting-a rawtna siamah hian bungraw chhiah 28% laknate chu 18% a tihhniam tum a ni a, 18% lak ṭhinnaah 12% emaw 5% emaw lak tura tihhniam tum a ni. GST chhiah tihhniam tumna hi 'merit' emaw 'standard' emaw tiha sawi a ni. Vaihlo leh a kaihhawih bakah luxury automobile-a 'sin tax' erawh tihsan tum niin 40% lak a nih rin a ni.

GST siamṭhat tumna hrang hrang zingah nitin mamawh, ei tur lam leh textile product zawng zawng deuh thawah 12% aṭangin 5% ah tihhniam tum a ni. Tax lak tihhniam hian bungrua hralhna maximum retail prize (MRP) pawh a nghawng beisei a ni bawk. Healthcare huangah cancer damdawi leh mimal health & life insurance pawh GST ngaihhnathiam tum niin, damdawi lam thilah pawh GST 12% aṭangin 5% ah tihhniam tum a ni. Cement-ah chhiah 28% lak chu 18% ah tihhniam tum a ni bawk.

Chhiah lakna sang hman chhunzawm tur leh tihsan tur zingah hian luxury leh sin goods kan tih ang chi - tobacco, pan masala, leh luxury automobile-ah 40% lak a nih rin a ni a, Electric Vehicles (EV) Rs nuai 20-40 chinah chhiah 5% aṭangin 18% ah tihpun tum a ni thung a, luxury EV Rs nuai 40 chinah 40% lak a nih rin a ni. Thawmhnaw Rs 2,500 chin chunglamah 12% aṭangin 18% ah tihpun a ni dawn bawk.

Mi thiam zawkte chuan chhiah tihdanglam hian ramchhung thilsiam lei a tihpun an ring a, a bikin chhungkaw khawsak pangngaiah a nasat an rin thu an tarlang. Chhiah lak dan tihdanglam hian inchhung inrelbawlna leh sumdawnna huangah a ṭha zawnga nghawng a neih an beisei bawk. Council meeting hi ni hnih an nei dawn a, ni hnih hnuah thutlukna te siam a ni ang.