Singapore PM ni thum cham turin a rawn zin

India leh Singapore kum 60 chhung thawh dunna lawmna kal zelah Singapore prime minister Lawrence Wong chuan ni thum chhung cham turin Thawhlehni khan India a rawn thleng. External affairs ministry chuan Wong rawn zin hi ram pahnih inkar tihngheh zualna hun remchang tak a nih thu an tarlang.

Singapore PM hi foreign minister Vivian Balakrishnan, acting minister for transport and senior minister of state for finance Jeffrey Siow, leh ministry of foreign affairs and ministry of trade and industry-a minister of state Gan Siow Huang-te'n an rawn zui a ni. Wong-in India a rawn tlawh hma hian ram pahnihte hian August 13 khan India-Singapore Ministerial Roundtable (ISMR) an lo nei tawh a, ISMR-ah hian ram pahnih aiawh minister hrang hrang an tel.

Wong hian a cham chhungin prime minister Narendra Modi kawmin, Mumbai-a PSA phase-2 Bharat Mumbai Container Terminal an hawng dun nghal ang. India a rawn tlawh chhan ber chu India leh Singapore thawh dunna tur atana semiconductors, capacity-building, skills development, leh infrastructure building huanga thawh dunna tihzauh dan tur ngaihtuah a ni. Modi nena an inkawmnaah hian Myanmar dinhmun pawh an sawi dun beisei a ni.