NIRF ranking-ah IIT-Madras pakhatna

Ministry of education chuan National Institutional Ranking Framework (NIRF) 2025 vawi 10-na ranking chu nimin khan a tichhuak a, overall category-ah Indian Institute of Technology-Madras (IIT-Madras) chu pakhatna niin, Indian Institute of Science (IISc) Bengaluru pahnihna leh Indian Institute of Technology Bombay (IIT-Mumbai) chu pathumna a ni. IIT-Madras hi a zawna ṭum sarih pakhatna a nihna a ni.

Education minister Dharmendra Pradhan chuan NIRF 10th edition ranking hi a puang a,category hrang hrang 17-ah ranking siam a ni. NIRF ranking hi kum 2015 aṭangin Ministry of Human Resource Development ni ṭhin Ministry of Education tih tak hnuaiah hian tihchhuah ṭan a ni. Ranking siam hi ramchhunga higher education institution hrang hrang inrelbawlna leh kalphung langtlang taka hriat theihna tura ruahman a ni.

Ranking siamna atan hian huang hrang hrang - teaching, learning and resources; research and professional practice; graduation outcomes; outreach and inclusivity; leh perception hmanga endikna kalpui ṭhin a ni. Category 17 - overall, universities, colleges, research institutions, engineering, management, pharmacy, medical, dental, law, architecture and planning, agriculture and allied sectors, open universities, skill universities, State public universities leh Sustainable Development Goals (SDGs)-ah ṭhenin ranking pek an ni ṭhin.