Congress-in GST siam ṭhat dan sawisel

Congress party general secretary in-charge communications Jairam Ramesh chuan Nilainia Goods and Services Tax (GST) siamṭhat chu kim lo leh ṭha tawk lo a ni, a ti. Ramesh chuan BJP in GST an siam ṭhat chu "GST 1.5" a ni a, nakin lawkah a kimchang zawk "GST 2.0" in a chhunzawm dawn niin a sawi.

Rahul Gandhi pawhin GST siam thar chu prime minister Narendra Modi-a'n August 15, I-Day-a thu a sawi ṭumah a lo sawi lawk vek tawh tih sawiin, GST council-in meeting an neih hmain a ruangam siam vek a ni tawh a ni, a ti. Ramesh pawhin council nihna chu tihnep sak a ni tiin, a nih dan tur a pha lo a ni, a ti ve bawk.

Hei bakah hian Congress chuan chhiah lak tihhniam hian private investment leh a bikin manufacturing-ah nghawng a neih dawn loh avangin awmzia a nei thui dawn lo niin an sawi. Hetih laiin chhiah tihhniam hian hun rei lote chhung atan Micro, Small, and Medium Enterprises (MSME) tan harsatna a chhawk anga, mahse hunin a la hril zel dawn niin an tarlang.

Union finance minister ṭum li lo ni tawh P Chidambaram chuan," GST siamrem tharah bungrua leh service hrang hranga chhiah tihhniam a ni chu a lawmawm ka ti a, mahse, kum riat laiin he thil kalpui tur hi an tlai a ni," a ti. "Khang kum riat liamta chhung khan harsatna nasa tak chu kan lo tuar vek tawh a, sorkar chuan kan ngennate chu a bengkhawn si lo a ni," a ti bawk.