Sorkarin thil thawn chhuaktute dinhmun ngaihtuah dawn

Sorkar laipui chuan ram chhung mipui nawlpuite chhawr theih leh khawsak tihziaawmna tura Goods and Services Tax (GST) lak zat siam thara a tihhniam hnuah, US-in bungrua a chawk luha chhiah a tihsan avanga harsatna tawk, thil thawn chhuahtute harsatna tihziaawm dan tur a ngaihtuah leh dawn nia sawi a ni.

US president Donald Trump-a'n India-in Russia oil a lei avanga India bungrua an chawk luh tam zawka chhiah 50% lakna tur a siam chuan ram chhung bungraw thawntute tan harsatna a thlen a, hei vang hian sorkar chuan an export sector-te pual hian scheme a siam dawn niin an tarlang.

US-in chhiah a lak zat a tihsan hian textile leh thawmhnaw, tlereuh lam bakah leather leh pheikhawk, chemicals, engineering good, agirculture leh lui lam sa thawn chhuaktute a nghawng na hle a ni.

Sorkar chuan Covid-19 hri len laia MSME te puihbawmna tur a siam ang khan bungraw thawn chhuaktute harsatna chhawkna turin a ngaihtuah mek nia sawi a ni. Kumin kum tir aṭanga thla li chhung India-in US bungrua a thawn luh hi a kum hmasa aiin 21.64% in a pung a, USD tld 33.53 a tling. Heng bungraw thawn luh zinga a zahve dawn chu chhiah lakna thara 50% lakna tura tih zingah an tel lo.