Chhattisgarh-ah NHM staff 14,000 chuangin banna theh lut

Chhattigarh sorkarin an state-a National Health Mission (NHM) staff 25-te a ban avangin contract-a thawk mi 14,000 chuang lungawi lote chuan banna an theh lut ve nghal tih nimin khan an aiawh chuan a sawi.

NHM staff-te hi August 18 aṭang khan nawrh an huaihawt a, an thil phut zingah hnaa dah ngheh leh an hnathawh dan siamṭhatte a tel. Hun rei tak nawrh an huaihawt chungin sorkar chuan an thil phutte ngaihtuah sak loin, hremna a lekkawh zawk niin an tarlang.

Hetih lai hian sorkar official-te chuan State Health Committee-in NHM hnuaia contract-a thawkte thil phut 10 zinga pali chu an pawmsak tawh a, a dang pathum zirchiang tur committee pawh din a ni tawh a ni, an ti. An thil phutte ngaihtuah mek a nih avangin an hna thawh chhunzawm turin vawi tam tak an ngen chungin an zawm duh lo a, hei vang hian thawktu 25-te chu September 3 khan ban an ni, tih an sawi. Ban zingah hian Chhattisgarh Pradesh NHM Karamchari Sangh president Dr Amit Kumar Miri, general secretary Kaushlesh Tiwari, leh Pranntiya Sanrakshak Hemant Kumar Sinha te an tel a ni.

NHM Chhattigarh-ah hian contract-a thawk mi 16,000 vel an awm a,thawk zinga banna la theh lut lo mi dangte pawhin an theh lut ve thuai dawn tih an sawi. Anni lam chuan an thil phut chungchangah memorandum chu vawi 160 zet sorkarah an theh lut tawh a, tun thlengin sorkar aṭangin chhanna mumal an la dawng lo tih an sawi ve thung.