AIMIM in eptu pawl VP candidate thlawp dawn; Civil society hruaituten eptu candidate thlawp turin MP-te ngen

All India Majlis e-Ittehadul Muslimeen (AIMIM) chuan India vice president thlanna neih turah, eptu ṭangrual pawl, INDIA bloc candidate B Sudershan Reddy chu an thlawp dawn tih an puang.

AIMIM president Asaduddin Owaisi chuan Supreme Court judge hlui, Reddy an thlawp tur thu hi nimin khan a puang a, amah ngei pawh biain duhsakna a hlan thu a sawi.

Telangana-a civil society hruaitu hrang hrangte chuan eptu pawl candidate Reddy hi thlawp turin MP-te an ngen bawk. Party nihna dah ṭha a, India ram democracy humhim a nih zel theihna tura Vice President atana Reddy thlang tling ngei turin an ngen a ni. Ngenna an siamah hian civil society hruaitu 100 chuangin an hming an ziak.

Ngenna an siamah, civil society hruaitute chuan kum eng emaw chen aṭanin India ram democracy dinhmun chu a him tawk tawh lo hle tih an sawi. Ram danpui humhalh duhtu, judge a nih lai pawha huaisen taka thutlukna siam ngamtu justice Sudershan Reddy chu India democracy humhim tur leh, mipuiten Parliament-ah rinna an ngah ngam lehna turin a pui thei dawn a ni, an ti. India ram inrelbawlna ṭha din thar leh turin justice Reddy thlan tlin chu thil pawiamwh a ni tiin, MP te pawh uluk taka ngaihtuah turin an ngen.

August thlaah Vice President a nihna aṭanga Jagdeep Dhankar a ban tak avangin a thlaktu tur hi September 9 hian thlan a ni dawn a, rorellai BJP kaihhruai National Democratic Alliance (NDA) chuan candidate atan Maharashtra governor CP Radhakrishnan a ruat a ni.