Vawiinah Vice President thlang dawn

Parliament member-ten vawiin hian vice president thar tur an thlang dawn. Candidate pahnih awmin, rorellai BJP kaihhruai National Democratic Alliance (NDA) candidate Maharashtra governor CP Radhakrishnan leh eptu pawl intelkawm, INDIA bloc candidate justice B Sudershan Reddy te an ni.

Vawiina inthlan neih turah hian Odisha-a eptu party lian ber, chief minister hlui Naveen Patnaik kaihhruai Biju Janata Dal (BJD) chuan an MP-ten vote thlak loin an hai dawn tih an sawi.

Vice president thlanna neih tur pual hian NDA leh INDIA bloc chuan Pathianni leh nimin khan party hrang hrang MP-te chu inthlan dan kalphung inzirtirna an neihpui a ni. INDIA bloc lam hian nimin khan mock polling session chu an MP te nen an nei nghal a, NDA training-ah hian prime minister Narendra Modi bakah BJP minister leh MP eng emaw zat an tel bawk.

Pathiannia workshop neihah hian BJP chuan GST reform chungchanga resolution an pass nghal a, resolution pawm thar hi PM Modi kaihhruaina hnuah inhrilhfiahna hun neih nghal niin GST kalphung thar chu awlsam zawka siam leh mipui mil zawnga siam a nih thu an tarlang. NDA hnuaia an thawhpui MP dangten nimin khan worshop hi an chhim ve bawk. Pathiannia mock poll buatsaih hi Central hall, Samvidhan Sadan-ah neih a ni.

BJP-in GST reform chungchanga resolution an siamah hian,"Nitin mamawh hrang hrang ei tur leh damdawi bakah electronic bungrua eng emaw zatah a man tihhniam a nia; hei bakah sum lak ṭhin inverted duty pawh tihhniam leh siam ṭhat a ni bawk a; sumdawnna tenau, thawn chhuah leh startup thlurbing an ni. Chhiah lak dan siam ṭhat hian mipuite harsatna chhawk leh sumdawngte thuam chak a, India mahni kea ding thei tura siam leh thla tina ram ṭhanna tur nghet tak siam a, Rs vbc nuai 2 tal lak luh theih chu a tum ber a ni," tiin an tarlang.

Hetih laiin Congress president Mallikarjun Kharge chuan eptu pawl MP te tana nimin tlaia zanriah buatsaih a tum chu a ṭhulh a, hei hi ramchhung hmun hrang hranga chhiatna thleng leh mipuite tawrhna thleng vang tih a sawi. BJP pawhin MP kalkhawm tana zanriah a siam a tum pawh tuilian vanga ram chhunga harsatna thleng mek vangin an ṭhulh zui ve bawk.