India leh EU te'n FTA atana inremna turin inbe dawn

India leh European Union chuan Free Trade Deal (FTA) chungchangah thla khat hnuah inbiakna ṭum hnih huaihawt an tum leh a, hemi ṭum hian inremna tur pawimawh siam theih an tum a ni. Inbiaknaah hian ram pahnih duh dan ve ve ngaih pawimawh tum niin, kumin December hma hian tihfel tum a nih thu thuneitu lam chuan an tarlang.

European Commission-a agriculture commissioner Christophe Hansen leh trade chief Maros Sefcovic-te chuan India aiawhte nena inbiakna nei turin kar lehah hian India an rawn tlawh dawn a ni. Tun dinhmunah European Union hi India sumdawn pui lian ber niin 2023-24 inkarah khan insumdawn tawnna hi USD tld 135 a tling pha.

Trade deal bakah hmasawnna thlen tur thawh dunna tur hrang hrangah inremna an nei a, tunlai khawvel buaina sang zelah defence huanga thawh dunna tur inremna siam tel pawh an tum bawk. EU hian September 17 ah strategic hmathlir thar tlangzarh a tum a, India nen hmalam hun atana thawh dunna ṭha zawk a thlen ngei beisei a ni.

Ram pahnih hian thla thum lo awm tur chhung hian high-level meeting leh inbiakna neih chhunzawm an tum a, inbiakna neih turah hian EU political leh Security Committee leh EU-a member ram 27 aiawhte an tel dawn a ni. Meeting neih leh tur zingah hian November-a EU-India Trade and Technology Council (TTC) pawh a tel.