Bird flu leng vangin Kerala leh Haryana-ah centrel team kal
Sorkar laipui chuan Kerala leh Haryana state-a bird flu (h5N8) lenna district-ah hri len dan leh hri darh tur venna atana hma lak dan enfiah turin multi-disciplinary team a tir.
Ministry of health and family welfare chuan central team te hi Kerala-a Alappuzha leh Kottayam district leh, Harayana-a Panchkula district-ah tirh an nih thu a sawi. Central team pahnih tirhchhuahah hian National Centre for Disease Control, National Insitute of Virology, PGIMER, Chandigarh; Dr RMLA Hospital, New Delhi leh Lady Hardinge Medical College, New Delhi-a expert-te an tel a ni. State pahnihah hian ministry of health and family welfare-in bird flu leng thununna tura ruahmanna a siamte a nih dan turah state health department-te an pui dawn a ni.
Union minister for animal husbandry, fisheries and dairying Giriraj Singh chuan bird flu leng chungchangah hlauhthawnna tur a awm lo tih a sawi a, hemi rual hian mipuite chu artui leh sa an ei turte chhum hmin ṭha turin a chah. Bird flu lenna state-ah hri darh tur veng tur hian sorkar laipui chuan theihtawpin a puih zel tur thu a sawi.
Kerala leh Haryana bakah Himachal Pradesh, Rajasthan leh Madhya Pradesh-ahte hri leng vang hian sava tam tak an thi tawh a, hri len ṭanna chhan ber hi sava pem chi vang nia hriat a ni. Kerala-ah chuan bird flu leng mek chu state disaster-ah puan a ni tawh bawk. Madhya Pradesh chuan state dang aṭanga ar leh sava lam chi lakluh a khap a, Himachal Pradesh pawhin ar leh arsa aṭanga thil siam bakah sangha zawrh chhuah chu sub-division pali huam chhungah a khap tawh bawk a ni.