Coronavirus vaccine app lem lakah fimkhur turin chah
Sorkar laipui chuan ram chhunga corovirus vaccine sem chhuan dan enfiahna tur leh, vaccine la turte in register-na tura mobile application a siam mek, Co-WIN (COVID Vaccine Intelligence Network) app ang takin app lem siam a awm a, hemi laka hian fimkhur a, download lo turin mipuite a chah.
Union health ministry chuan sorkarin a siam, Co-WIN hi Google play store leh app store dangah pawh dah a la ni lo, a ti. Hetih lai hian misual ṭhenkhatin Co-WIN tih hming pu thoin app lem an lo siam a, hei hi download tura an dahchhuah thu ministry chuan a sawi. He app lem hi download lo tur leh,personal data pawh dah lut lo turin mipuite a chah a ni.
Covid-19 vaccine semchhuah theih hun a hnaih tawh avangin state leh UT sorkar hrang hrang chuan vaccine dawng hmasa tur, healthcare leh frontline worker-te data chu Co-WIN software-ah an upload mek tih ministry chuan a sawi bawk. Co-WIN app hi peihfel a nih hunah a thlawna download tura chhawpchhuah a ni dawn a, he application hmang hian vaccine data chu record theih a ni dawn a ni. Vaccine la duhte chuan app hi an download hnuah, an in register a ngai ang.