India leh Mauritius-in ram pawisa hmangin sumdawn tawnna kalpui tum

India tlawha rawn zin, Mauritius prime minister Navinchandra Ramgoolam leh prime minister Narendra Modi-te chu nimin khan an inkawm a, kawng hrang hranga thawh dunna tur chungchang an sawi bakah ram pahnih insumdawn tawnna atan ramchhung pawisa ve ve hmang tura hmalak an rel. Ramgoolam hi India a rawn tlawh vawi khatna niin, September 9-16 chhung chamin Ayodhya leh Tirupati a tlawh dawn bawk.

PM Modi chuan ram pahnihte chu tum thuhmun, suangtuahna inang nei an nih thu leh thawh dunna nghet tak nei an nih thu a sawi. India Ocean chu ram pahnihte'n hmun pawimawh an inṭawm a nih thu leh, hemi kaltlanga hian nghet, leh ziktluak zawka thawh dunna kalpui tum a nih thu a tarlang.

Modi chuan," India chuan Mauritius Exclusive Economic Zone kaltlanga tuipui huanga thawh dunna tihzauh leh venhimna thuam chakna a tum a ni," tiin Indian Ocean huamchhunga venhimna pe turin a inpeih reng ṭhin thu a sawi.

Ramgoolam chu May thlaa United Kingdom awpna aṭanga Chagos Island enkawl tura thuneihna an neih avanga a lawmpui thu sawiin, Modi chuan 'Chagos Agreement' an nei thei chu hnehna ropui tak a ni, a ti. He island hi kum 50 chuang liam hnuah inremna neiin Mauritius hnenah hlan fel a ni ta a ni.